Job 23

UJobe Uyaphendula

1 Waphendula uJobe wathi:

2 “Lalamuhla ukusola kwami kulokhu kubuhlungu kabi, isandla sakhe siyasinda loba ngibubula kangaka.

3 Ngabe ngiyakwazi lapho engingamfumana khona; aluba nje bengingaya emzini wakhe!

4 Bengizayibeka kuhle indaba yami ngigcwalise umlomo wami ngamazwi aqatha.

5 Bengizakuzwa ukuthi yena uphendula athini, ngikuhlolisise lokho akutshoyo.

6 Kambe angangiphikisa ngamandla na? Hatshi, angazake angethese cala.

7 Lapho umuntu oqotho ubengendlala indaba yakhe phambi kwakhe, njalo bengizakhululwa lanini kumahluleli wami.

8 “Kodwa uma ngisiya empumalanga, yena kakho khona; uma ngisiya entshonalanga, kangimfumani khona.

9 Nxa esemsebenzini enyakatho, kangimboni; angaphendukela eningizimu, kangiboni lokuthi tshazi kwakhe.

10 Kodwa uyayazi indlela engihamba ngayo; nxa esengilingile, ngizaphuma senginjengegolide.

11 Izinyawo zami bezilokhu zilandelana lezinyathelo zakhe; ngalela endleleni yakhe angaze ngaphambuka.

12 Angigudlukanga emilayweni yezindebe zakhe; ngiwenze igugu amazwi omlomo wakhe okudlula isinkwa sami sansuku zonke.

13 “Kodwa uzimele yedwa, ngubani ongaphikisana laye na? Uyenza loba yini ayifunayo.

14 Uyagcwalisa isimiso sakhe ngami, njalo asemanengi amanye amacebo anjalo awagcinileyo.

15 Yikho nje ngithuthumela ukuma phambi kwakhe; ngithi ngingakukhumbula konke lokhu ngimesabe.

16 UNkulunkulu usenze inhliziyo yami yaphela amandla; uSomandla usengethusile.

17 Kodwa kawuyikungithulisa umnyama lo, umnyama lo onzima ovala ubuso bami.